Malaysia PM bang turin phut

Malaysia Prime Minister Najib Razak chu sorkar hnuaia investment fund, 1MDB
aṭanga a mimal hman tura dollar tluklehdingawn khat pawtpenga puh a nih avangin bang tur an nawr.

PM Razak hian investment fund aṭang hian ram, lemziak man to tak tak leh jet leina atan sum tam tham tak hi a pawtpeng nia puh a ni. Nilaini khan California-a US Justice Department-ah thubuai thehlutin, IMDB aṭanga sum pawhpen hmanga thil leite man tura ngenna siam a ni.

IMBD fund hmanga thil lei zingah hian lemziak man to dollar maktaduai 137 man vel a tel a, heng zingah hian Claude Monet lemziak dollar maktaduai 35 man pawh a tel niin US Attorney leh California Chief Prosecutor Eileen Decker chuan a sawi.

Malaysia PM hlui Mahathir Mohamad chuan PM Razak ban a nih theih nan mipuite chuan vote lak phut se a duh thu a sawi a, hei bakah hian PM-in sum a tihchingpen duh lohna lantir tura a duh thu a sawi.

Eptu party hruaitu, Wan Azizah Wan Ismail chuan sum tam tak eirua PM puh hi chhui chian a nih theih nan PM a nihna aṭanga bang turin a phut bawk.

Hetihlai hian Malaysia Attorney Gene≠ral Mohamed Apandi chuan thuchhuah siamin, 1MDB fund hi PM hian a pawtpeng tih finfiahna engmah a awm lo a, hei vang hian eng thubuai mah siam theih a ni lo, a ti. PM an puhna chu thil dik lo a nih thu a sawi.