China-in plastic bag hman khap dawn

China chuan kumin kum tawp aṭangin an khawpui tam zawkah ṭawih thei lo plastic bag leh thil dang ṭawih thei lo hman a khap dawn tih leh, kum 2022-ah chuan an ram pumah khap vek a ni tawh dawn tih Pathianni khan thuchhuah siamin an tarlang.

Industry leh restaurant-te'n an hman ṭhin plastic aṭanga siam 'straw' chu kumin kum tawp aṭang­in an khap tawh dawn bawk. China ramah hian bawlhhlawh inchhek khawm a tam hle a, mi tluklehdingawn 1.4-in kum 25 chhunga an chhek khawm chu football field 100 luahkhat thei khawp a ni tawh. 

Hei vang hian China hi blawh­hlawh paihnaah an buai chho mek a, 'China National Development and Reform Commission' chuan Pathianni khan kum nga chhunga hman tur policy thar a duan chhuak a ni. He policy tharah hian kum 2022-ah khawpui leh thingtlangah plastic bag hman khap vek tawh tur a nih te, plastic bag siam chhuah leh hralh chungchangah pawh 0.025mm aia pan chin chu khap a nih tur thu te, Industry restaurant-a plastic hman ṭhin zawng zawngte chu 30%-a tihtlem tum a nih thu te leh kum 2025-ah chuan hostel hrang hrangah plastic leh a kaihhawih hman khap a nih tur thute dan tharah hian ziah lan a ni.   

Kum 2017 khan China hian an khawpui hrang hrang aṭangin bawlhhlawh tonne maktaduai 215 zet an dahkhawm a, hemi kum vek hian China ram chu plastic bawlhhlawh lalut hnem ber ram a ni bawk. Kum 2010 khan plastic bawlhhlawh neih zat chu tonne mtd 60 zet a ni. China chauh hi Asia rama plastic hman khap tuma hma la a ni lo a, Thailand ram pawhin an rama dawr lian zual bikah plastic bag hman a lo khap ve tawh bawk a ni. Kum 2021-ah an rampumah plastic bag hman khap vek an tum ve tho a ni.

 

Indonesia khawpui Jakarta-ah pawh kumin June thla aṭangin plastic bag hi departmental store, bazar lun laiah te leh bazar hmun hrang hrangahte hman khapna tur thupek sorkarin a lo tichhuak ve tawh bawk a ni. Khualzin vei vakina kumtina an tlawh pawh fo Bali-ah pawh plastic hman khap a ni.