Germany-in Munich-a kahhlumte sun

Germany-a Munich khawpuiah kar kalta Zirtawpni zan khan rawlthar pakhatin sumdawnna hmun, Hanauer Street-ah silai pawng kahin mi pakua a kaphlum a, mi dang 27 in hliam an tuar bawk. Silai hmetpuaktu hi a hnuah a inkahhlum zui a ni.

Inrinni khan pawi-khawihna thlenga thi te sunin Olympia shopping mall-ah mi tam tak an pungkhawm. Pawi-khawihna thlenna bula pavement-ah chuan mitthi te sunna leh hriatrengna pangpar ṭhahnem tak dahkhawm a ni. German Chancellor Angela Merkel pawhin thuchhuah siamin, mitthi chhungte an tuarpui takzet tih a sawi.

Police-te chuan pawi-khawihtu hi kum 18 mi, Ger-man-Iranian a nih thu an sawi a, official-in a hming hi puanzar ni lo mah se David Ali Sonboly, David S tia hriat a ni. A ipte ah 9mm Glock pistol leh silai mu 300 vel hmuh a ni. Ralthuam hi khawi aṭanga a neih nge an la hriat loh thu leh permit pawh a neih loh thu an sawi.

Zirtawpni zan tir lam khan David S hian Ha-nauer Street-a awmte chu a pawng kah a, hemi hnu hian abula dawr lian, Olympia shopping center-ah tlan lutin a hmuh hmasak apiang a pawng kah leh a ni. Mi pakua an thi a, hliam zinga mi 16-te chu damdawi-inah enkawl a ni. Pawikhawihtu hi a tlanchhiat hnuah, a pawikhawihna hmun
aṭanga km 1 vela hlaah a ruang hmuh a ni a, police-te chuan amah a inkap-hlum niin an sawi. Mi pakua thi zinga pasarih-te hi tleirawl an ni a, an zinga pathum chu Kosovo a mi niin, Turkey ram mi pathum leh Greece mi pakhat an tel.

Germany police-te chuan pawikhawihtu room an dapa an thil hmuh aṭangin mipui awmkhawmna hmuna silai hmehpuah chakna a nei nia an ngaih thu an sawi a, firfiak pawl Isla-mic State nena inzawmna an neih hriat a nih loh thu an sawi bawk. A room-ah hian mipui pungkhawm thah chung-chang ziahna lehkhabu te hmuh a ni. Tunhma lam lamin pawikhawihna thila inhnamhnawihna a neih loh thu leh, thubuai pawh a la nei ngai loh thu an sawi. Police-te chuan tualthattu hian depression nasa tak a neih avangin psychiatric care-ah enkawl a ni tawh niin an sawi.