California ram kang vangin mi tam tak tlanchhia

US-a California state-ah kar kalta Zirtawpni tlai aṭang khan ram a kang leh a, mi tam tak hmun him lamah an tlan-chhia a, ram kang hi helicopter hmanga ṭhelh mek a ni.

Ram kang hian Los Angeles County bial a tuam a, Inrinni zan thleng khan ram acre 20,000-a zau a kang tawh a ni. Santa Clarita khaw bulaa cheng mi 300 vel chu hmun him lamah sawnchhuah an ni tawh a, Pasadena leh Gendale-ah chuan meikhu leh meivap leng nasa avangin vantlang punkhawmna hmunte khar a ni bawk.

Khaw lum lutuk leh thli tleh avangin kangmei chhuak hi a darh chak hle niin khaw chin zirtute chuan an sawi a, ramkang hi a la darh zel an rin thu an sawi bawk.

Ram kang hi a hmingah Sand Fire tih an vuah a, Zirtawpni tlai lam khan Santa Clarita bula Sand Canyon aṭangin a chhuak a, thli a tleh avangin chak takin Angeles National Forest lam a kangkai a ni.

Kangṭhelhtu 900 velin ram kang hi an ṭhelh a, helicopter hmangin chung lam aṭangin tuia phuh a ni bawk.

Los Angeles County Deputy Fire Chief John Tripp chuan ram kang vang hian chenna in 1,000 vel chu dinhmun hlauhawmah an awm mek tih a sawi a, kangmei chhuak hi a zual zel a nih chuan in 45,000 vel chu a him dawn lo tih sawiin, heng zinga a tam zawk chu San Fernando Valley ami an ni, a ti. Wildlife Waystation-a ramsa 400 vel pawh hmun him lamah sawnchhuah an ni tawh a ni.