Kabul-a bomb puak-ah mi 80 thi

Afghanistan khawpui, Kabul-ah kar kalta Inrinni khan lungawi lohna lantira pungkhawmna awmna hmunah ṭum hnih bomb a puak a, mi 80 an thih bakah mi dang 200 chuangin hliam an tuar. Kum 2001 hnua nikhat thil thua pawikhawihna thleng rapthlak ber a ni.

Inrinni khan Hazara hnamte chuan Bamiyan province-a Hazara ho ram kaltlanga power line kaltir tumna duh lohin Kabul-ah hian lungawi lohna an lantir a ni. Mipui pungkhawmte awmna hmunah hian thihchilh bomb pahnih tihpuah a ni. Bomb pathumna tihpuah tumtu chu a tihpuah hmain police-ten an kaphlum hman a ni.

Pawikhawihna thlen hnu hian Islamic State (IS) firfiak pawl chuan thuchhuah siamin, bomb tipuaktu niin an inchhal. Taliban chuan inhnamhnawihna an neih loh thu an sawi thung.

Afghanistan President Mohammad Ashraf Ghani chuan pawikhawihna thleng chu a dem thu leh, thi chhungte a tuarpui thu a sawi a, "Sorkar chuan theihtawpin nawrh huaihawtte himna tur hi a ngaihtuah a, mahse firfiakte hi an zingah lutin, pawikhawihna hi an thlen ta a ni. Mi tam takin ram tan nunna an hlan a, hliam tuar zingah pawh security leh defence force mi eng emaw zat an tel a ni" a ti. Ram pum huapin mitthi te sunna hun hman a nih tur thu leh, an chhungte leh hliam tuarte pui chu an theih ang anga pui turin thuneitute a hriattir bawk.