US President thar lakluh inkhawm In lam aṭanga hmanpui turin mipui ngen
US President thar atana Joe Biden lakluh a nih dan tur buaipuitu, President Inaugural Committee chuan nakkum January 20-a President thar lakluh inkhawm neih turah hripui leng vangin ṭum dang anga mipui punkhawmna siam theih a nih dawn loh avangin he hun hi in lam aṭanga lo hmanpui turin an ram mipuite an ngen.
President Inaugural Committee chuan January 20-a hun hman dan tur ṭhenkhat a tichhuak tawh a, President kalchhuak tur Donald Trump chuan President thar lakluh inkhawm hi a hmanpui dawn em tih la tichiang lo mah se, ruahmanna an kalpui zel tih an sawi.
Hripui leng vangin tihdan phung an lo neih angte zawm vek theih a ni dawn lo tih sawiin, Congress member nena chaw chhun ei ho te, lakluh hmaa President kalchhuak tur nena thingpui in dunna hunte chu buatsaih a nih dawn leh dawn loh sawichian a la ni lo.
President-elect Joe Biden leh Vice Preisdent-elect Kamala Harris-te chuan US Capitol building pawn-ah rinawmna thu an tiam dawn a ni. Lakluh inkhawm hman zawhah Biden chuan inaugural address neiin, an rama hripui leng mek an hneh theihna tura a ruahmana siam te, America ram ṭha zawk leh inpumkhatna ṭha siamna tura a hmathlir neihte a puang ang.
Inauguration chief medical adviser Dr David Kessler chuan an ram pumah hripui a la len chhunzawm reng a, hei vang hian America mipuite chu an himna tur te, an chhungte, ṭhiante leh khawtlang himna turin President thar lakluh inkhawm hi a hmuna tel tum lo a, an in lam aṭanga lo hmanpui turin an ngen tih a sawi.
US hi khawvela Covid-19 kai leh thihpui tamna ber ram a la ni chhunzawm zel a, hrik kai hmuh tawh hi mi 1,71,43,942 an tling tawh a, an zinga 3,11,073 in an thihpui tawh a ni.