Pakistan President-in anti-rape ordinance a pawm

Pakistan president Arif Alvi chuan pawngsualtute hremna tur, anti-rape ordinance chu law-a chantir a nih theihna turin a pawm. 

He dan hnuaiah hian pawngsualtute thubuai chu thla li chhunga ngaihtuah fel nghal tura tih a ni a, an thubuai ngaihtuahtu tur special court din a ni bawk ang. Mipat hmeichhiat lam hawia mawi lo taka che ṭhinte chu chhinchiah vek an ni dawn a, pawngsual tawktute hming leh nihna chu thup niin, pawngsualtu ṭhenkhat chu  damdawi hmanga pa thei tawh lo tura siam phal a ni bawk ang. 

Prime minister Imran Khan leh a cabinet chuan he ordinance hi thla hmasa khan an lo pawm tawh a ni. President-in a pawmpui hnuah Parliament chuan ni 120 chhungin law ngheta chantir turin an nemngheh ve leh a la ngai ang. 

Hetih lai hian ṭhenkhat chuan he ordinance hi an sawisel a, hremna siam chu a na lutuk niin an sawi a,  an pawm hmain official-te chuan midangte an rawn ṭha tawk lo niin an sawi a ni.