Iran-in satellite dish 100,000 tichhia

Iran thuneitute chuan an rama phalna loa device hmangte dapchhuah hna a thawhnaah, satellite dish leh receiver 100,000 an tichhia.

Basij militia chuan satellite channel-te hian an rama chhungkaw inrelbawlna a tichhia a, hei bakah hian naupang zirna thlengin a nghawng a, satellite channel en nasa naupangte chu an nunchang a ṭhat loh phah niin a sawi. Basij pawl hotu, General Mohammad Reza Naghdi chuan Pathianni-a Tehran-a satellite dish tih≠chhiat lai hi a lo enpui a, satellite television-in an rama nghawng ṭha lo a neih dante sawi≠chhuakin, inṭhenna, addiction leh khawtlang him tawk lohna siamtu a ni, a ti.

Naghdi chuan Iran mi maktaduai khat velin thuneitute hnenan an satellite dish hi an hlan niin a sawi bawk.

Iran dan hnuaiah satellite equipment hi khap a ni a, he thil lo hmangtu, pe chhuaktu leh siamṭha tu chu dollar 2,8000 thlenga chawi tir theih an ni. Hei vang hian Iran police-te chuan inchunga satellite dish dahte chu dapin an lo mansak fo tawh a ni.

Culture Minister Ali Jannati chuan dan hmanlai chu siamṭhat a ngaih thu a sawi a, "Satellite hi khap ni mah se mi tam takin an hmang reng a, hei vang hian dan siamṭhat hi a ngai a ni. Dan hi siamṭhat a nih loh chuan Iran mipui 70% in dan an bawhchhe reng dawn tihna a ni" a ti. President Hassan Rouhani pawhin satellite dish khap chu ṭul lo a tih thu a lo sawi tawh bawk.