China-ah tuilian vangin mi 225 thi

China rama ruahsur nasa avanga tuilianin chhiatna thlenah mi 225 an thi tawh a, central Hubei Province-ah mi nuai 2.5 a tangkhang mek bawk.

Tuilian hian Hubei Province-ah khaw 10 a chim a, mi nuai 6.80 velin harsatna an tawk mek a ni. Tuilian tuarte chhanchhuak leh chhawmdawl tur hian sipai 500 bakah volunteer 1,000 tirhchhuah an ni a, speedboat 62 hmangin mi 10,000 chuang chu hmun him lamah hruaichhuah an ni tawh.

July 18-20 inkara ruah sur nasa tak avang khan tuilian leh leimin a thlen a, chenna in 52,900 vel a chhe tawh a ni. Hei bakah hian thlai chinna, ram hectare 700,000 chuanga zau tuiin a chim tawh bawk. Tuilian leh leiminin thil a tihchhiat hlut zawng hi US dollar tluklehdingawn 2.4 hu a tling a ni.

Xingtai City-a Daxian Village chuan tuilian hi an tuar nasa ber a, khaw pumin tuilian hian a chim a, he khuaa cheng mi pakua chu an thi a, chin hriat lohin pakhat a awm bawk.