Germany-ah Syrian refugee-in bomb tipuak

Germany-a Ansbach-a muci festival neihna bulah Pathianni khan Syrian refugee pakhatin a bomb ken tipuakin a thi a, mi dang 12 in hliam an tuar. Bomb tipuaktu hi kum khat liamtaah khan Germany-a inhumhimna pe tura a dilna chu hnawlsak a lo ni tawh a ni.

Bavaria interior minister Joachim Herrman chuan bomb tipuaktu hian a hmain ṭum hnih intihhlum a lo tum tawh niin a sawi. Pathianni khan Ansbach Open music festival neihna hmuna a kal tur chu a luh phalsak a ni lo a, a backpack-a a bomb pai chu a tipuak ta nia sawi a ni. Bomb puah lai hian festival neihna hmunah hian mi 2,000 chuang an awm.

Kar kalta chhung khan Germany ramah hian pawikhawihna ṭum li a thleng a ni. Zirtawpni khan Iranian-German rawlthar pakhat chuan Munich-a shopping mall bulah silai pawng kahin mi pakua a kaphlum a, a hnua amah a inkaphlum zui ve leh bawk. Pathianni zing khan Syrian refugee pakhat chuan chhimthlang lam, Reutlingen khuaah naupai lai pakhat a vithlum a, midang pahnih a vit hliam bawk. Pawikhawihtu hi police-ten an man a ni. July 18 khan Pakistan refugee pakhat chuan chhim lama Wuerzbuerg khuaah hreite hmangin mi panga a hliam a, polcie-ten an kaphlum ve nghal a ni.

Munich khawpuia pawikhawihna thlen hnu hian German official-te chuan silai hralhchhuah chungchangah dan khauh zawk siam an duh thu an sawi. Pawikhawihtu, kum 18 mi bag-ah hian silai leh a mu tam tham tak an hmu a, kawl phalna erawh a nei lo niin an sawi. German Vice Chancellor, Social Democrats hruiatu ni bawk Sigmar Gabriel chuan ralthuam hlauhawm tak neih a nih theih danah hian khuahkhirhna khauh tak siam a nih theih nan kan theih angin kan bei zel ang, a ti.