Japan-a care centre beihnaah mi 19 vit hlum

Japan rama Sangamihara khawpuia rilru lama rualbanlohna neite enkawlna, Tsukui Yamaguri-En facility chu nimin zing khan mi pakhatin chemte kengin a luhkhung a, mi 19 a vih hlum bakah midang 20 a hliam bawk. Pawikhawihtu hi a hnuah police station-ah a inpe a ni.

Tokyo police-te chuan nimin zing dar 2:30 vel khan Sagamihara, Kanagawa Prefecture-a Tsukui Yamayuri-En facility-a thawk pakhat chuan phone-a biain, an centre-ah pawikhawihna rapthlak tak a thlen thu a hrilh niin an sawi. He centre-ah hian damlo leh a thawktu mi 160 an awm a, zan lamah chuan an inkalh vek ṭhin. Mahse pawikhawihtu hian tukverh darthlalang tikehin in chhungah hian a lut nia sawi a ni.

Care centre beitu hi kum 26 mi, Satashi Uematsu a ni a, centre-ah pawh hian alo thawk tawh ṭhin. Kumin February thla khan politician-te hnenah lehkha thawnin, rualbanlohna neite chu dahbo vek a tum thute a sawi. Hei vang hian kar hnih dawn chu damdawi-inah enkawl a lo ni tawh a ni.

Tsukui Yamaguri-En facility beihnaa thi te hi kum 19-70 inkar an ni a, hlian tuar zingah mi 20-te chu an hliam na hle niin Sagamihara City Fire Department chuan a tarlang.

Japan ramah hian hetiang pawikhawihna hi a thleng khat hle a, hei hi silai khuahkhirhna dan a khauh vang nia ngaih a ni. Kum 2008 June 8 khan Tokyo-a Akihabara district-a sumdawnna hmunpuiah mi pakhatin a truck a khalh lut a, mipui pungkhawmte chu chem nen a pawng beih zui a, mi pasarih an thi a ni. Kum 2001 June 8 vek khan rilru lama harsatna nei mi pakhat chuan Oskaka primary school-ah naupang pariat a vit hlum. Kum 1995 March 20 khan Tokyo subway-ah pawl pakhat member-ten sarin gas an tihchhuah avangin mi 13 an thi a, mi sang tel an damloh phah bawk a ni.