South Sudan President-in a deputy ban

South Sudan President Salva Kirr chuan vice president Riek Machar chu banin, a aiah General Taban Deng Gai a dah nghal.

President Salva Kirr leh a ban tak, Riek Machar-te hi politics lama inhal tak niin, nikum khan hruaitu pahnih thlawptute inkarah hian buaina nasa tak alo chhuak tawh a ni. Hemi hnu hian thuneihna insem turin inremna hi an siam a ni.

Kirr leh Machar thlawptute inkarah hian tunhnaiah buaina a chhuak thar leh a, hei vang hian Machar hian kar hmasa khan an ram khawpui Juba a chhuahsan a ni. President Kirr chuan an ram buaina chingfel a, remna leh muanna a awm theih nana inremna an lo ziah zawhte a taka kalpui a nih theih nan Juba khawpuia kir leh turin Machar hi a ngen a, kar kalta Inrinni tlai thleng khan hun a pe a ni.

Mahse Machar hi hun pek chhunga a kir duh loh avangin an party chuan Inrinni zan khan meeting neiin, amah thlaktu atan Gai hi an ruat ta a ni. Vice president thar atana ruat, Gai hi Kirr leh Machar thlawptute inkara inremna a awm theih nana inbiakna neihah pawh Machar pawlte lam aiawhtu a ni.

Hetihlai hian Machar-a thawhpui hnai tak pakhat chuan Deng hi Machar-a thlaktu atana an pawm loh thu leh, hei hi Machar-a paihthlak tuma sorkar ruahmanna a ni, a ti.

President Kirr chuan vice president thar atana General Taban Deng Gai a ruat rual hian, a cabinet pawh a siksawi nghal bawk. Finance minister David Deng Athorbei chu banin,a aiah trade and industry minister Stephen Dhieu Dau a dah a, mining leh trade and industry ministry chu a dahruak bawk.