Turkey-in journalist 42 manna thupek tichhuak

Turkey sorkar chuan sipai chakna hmanga sorkar paih≠thlak tuma beihnaa inhnamhnawihte dap≠chhuah hna a kalpui meknaah, Thawhṭanni khan journalist 42-te manna tur thupek a tichhuak.

Sorkar paihthlak tumnaa inhnam≠hnawih≠a puh, sipai, police, judge leh sorkar hnathawk mi 60,000 vel chu man leh hrem an lo ni tawh a, sorkar chetdan hi European Union leh human rights group lam chuan an sawisel a ni. President Recep Tayyip Erdogan-an a thuneihna tilenna leh inlulinna remchangah a hman an hlauhthawn thu an sawi.

EU Commission President Jean-Claude Juncker chuan Turkey sorkar chetdan chuan EU zawm a tumna thlengin a nghawng thei dawn niin a sawi a, "Tuna Turkey dinhmun en chuan EU member ni mai chi niin a lang lo a ni" a ti. Hei bakah hian Turkey-in thi tura hremna, death penalty chu a hmang leh a nih chuan EU a tel a tumna pawh hei hian a titawp nghal vek dawn niin a sawi bawk.

Kum 2004 khan Turkey hian death penalty hi a lo titawp tawh a, mahse tunhnaia sorkar lam thlawptute chuan sorkar paihthlak tuma beitute hi thi tura hremna pe turin sorkar an phut a ni.

Turkey Prime Minister Binali Yidirim chuan an ram danpu siamṭha turin hma an la ṭan mek tih tih a sawi. Rorellai Justice and Development Party (AKP), eptu party Republican People's Party (CHP) leh Nationalist Movement Party (MHP)-te chua ram danpui siamṭha tur hian inremna an siam thei ta niin Yildirim chuan a sawi a, an danpui hman mek chu siamṭhat a ni dawn a ni, a ti.

PM Yildirim chuan July 15-a sorkar paihthlak tuma beitute beihletnaa thi, civil mi martarte chawimawi leh hriatrengna atan Istanbul aṭanga Europe leh Asia inkalpawhna lei, Bosphorus Bridge chu 'The July 15 Matyrs' Bridge' tia thlak a ni dawn tih a sawi bawk. Hei bakah hian Ankara leh Istanbul-ah civil mi thite hriatrengna lungphun siam a ni bawk ang.