Bernie Sanders-an Clinton-i thlawp

US Democratic National Convention chu Thawhṭanni zan khan Philadephia-ah ṭan a ni a, ṭan zana thusawitu zinga mi, party president candidate chuh tuma beitu, Bernie Sanders chuan Democratic presidential candidate tur, Hillary Clinton-i chu a thlawp thu sawiin, inthlanah pawh vote ṭheuh turin mipuite a sawm.

Sanders hian minute thum chhung chauh thu sawi mah se, mipuiten an lawm hle. Mipui kalkhawmte hnenah Clinton-i chu US president a nih ngei a ngaih thu leh, chumi tihlawhtling tura an
ṭanrual a ngaih thu a sawi. An khingpui, Repubican nominee Donald Trump-an hnehna a chan chuan America dinhmun ṭhat loh dan turte a sawichhuak bawk.

US First Lady Mi≠chelle Obama pawhin thu a sawi a, Hillary Clinton-i chu President candidate atana rintlak leh an ram naupangte tana entawn tlak awmchhun a ni, a ti. Republican candidate Donald Trump-a chu a hminghmerhin sawilang lo mah se, a bei na hle. White House chu mi
ṭhenkhat, sawisel ngaithei lo leh anchhuah mai hreh lo mi, America ram ropuia siam thei tur inti hnena dah ngam a ni lo tiin, "Tunah hian America hi khawvela ram ropui ber a ni" a ti.

Hetihlai hian Democrats nominee tur, Clinton-i hi Secretary of State a nih laia sorkar thuruk pawimawh thawnchhuahna atana a private email a lo hman avangin beih a la tawk zui reng a, an party chhungah ngei pawh president candidate atan duh lotu an awm. Convention neihna hmun≠ah pawh thusawituten an party candidate tura lungrual taka pawm tura an ngen lai pawhin an lo au el a ni.