Trump-a’n Supreme Court judge atan Amy Coney Barrett nominate

US President Donald Trump chuan Supreme Court judge atan Amy Coney Barrett a nominate tih kar liam ta Inrinni khan a puang.

Kum 48 mi, Barrett hi constitutional scholar leh conservative jurist a ni a, kum 2017 khan Trump hian federal appeals bench-ah a lo ruat tawh a ni. September 18 khan hun rei tak Supreme Court judge lo ni tawh leh liberal lamṭang nghet tak, justice Ruth Bader Ginsburg chu a thi a, a hmun ruak hnawhkhat tur hian Barrett hi President chuan a nominate ta a ni. Judge Amy Coney Barrett chu hlawhtlinna tam tak lo nei tawh, mi thiam tak, US Constitution ṭan leh vawnnun duh tlattu a ni, a ti. 

Ginsburg a thih hnuah President Trump chuan a thlaktu tur hi ruat a ni thuai dawn tih a sawi a, hei hi Democrats lam chuan na takin an sawisel zui. Inthlan neih phawt a, inthlan zawhah hnehna changtu President thar chuan justice thar a ruat zawk tur an ni, a ti. Mahse hei hi Republican lamin chhang letin, kum 2016 khan tuna Democrats presidential candidate, Joe Biden chuan justice hmun ruak chu inthlan kum pawh ni se a rang thei ang  bera hnawhkhah chu President tih tur a nih thu a lo sawi tawh chu an sawichhuak thar ve leh bawk. 

Republican Senate hruaitu chuan President-in justice thar atana a ruat hi November 3-a President thlanna neih hma ngeia confirmation vote lak a nih tur thu a sawi. Senate-ah hian Republican hian 53-47 majority a nei mek a, Republican senator pahnih chauhin inthlan hmaa confirmation vote lak tum hi an thlawp lo a, hei vang hian katlangpui ngei a nih rin a ni. 

Barrett hi Senate-ah pawm a nih chuan, Supreme Court justice pakua zingah conservating wing lam hian paruk an nei thei dawn a, hei hian US dan kalphung pawh a her danglam ngei rin a ni. Kum  48 mi Barett hi pawm a nih chuan Supreme Court-a justice ni thei naupang ber a ni bawk ang. 

Supreme Court justice thar atana nominate, Amy Coney Barrett hi  Notre Dame Law School aṭanga graduate niin, he school-ah vek hian constitution law a zirtir zui a ni. George Washington University Law School-ah adjunct faculty member leh University of Virginia Law School-ah visiting professor pawh a lo ni tawh bawk. 

Kum 2017 khan President Trump chuan 7th Circuit Court of Appeals atan a nominate a, court-ah judge 11 zingaha tel. Senate-a confirmation vote laknaah  Democrats member pathum chuan a lamah vote-in, a duhtu lamah vote 55 tlain, duh lo lamah vote 43 a tla a ni. A pasal Jesse Barrett hi Northern District of Indiana Assistant U.S. Attor­ney niin, kum 18 an innei tawh a, fa pasarih neiin an fate zinga pahnih hi an lak (adopt) an ni. Sakhaw mi tak leh, conservative ruh tak nia sawi a ni.