Covid-19 vaccine peih fel hmain Mi mtd 2 chuang thi hman mai thei : WHO

Khawvelah Covid-19 vanga thihna an la pun belh reng a, World Health Organisation (WHO) chuan vaccine peih fel a nih hmain he hripui vanga thi hi mi maktaduai hnih an chuang hman mai thei tih a sawi.  

WHO executive director Mike Ryan chuan mipuite hman theih tura Covid-19 vaccine peih fel a nih hma hian mi maktaduai hnih chuangin an thihpui hman a rin thu sawiin, tunah hian hri vanga thi hi mtd khat an tling tep tawh a ni, a ti. Chanchin duhawm lo leh ṭha lo zawk a thlen belh zel lohna turin khawvel chuan he hri laka invenna lam a ngaihtuah ṭhat a pawimawh em em a ni, a ti. 

Nimin thlenga Covid-19 hri vanga thi hi khawvel pumah mi 9,88,965 an awm tawh a, maktaduai khat an tling chho teuh tawh hle a ni. He hri chungchangah hian mithiamte ngaihdan a inang lo a, hri nihphung tak hi tumahin an la hrechiang thei lo a ni. 

Khawvel mithiamte leh ram hrang hrangte chu vaccine siam chhuah kawngah an intlansiak mek a, ṭhenkhat chuan kumin kum tawp lamah peihfel hman an tum a, ṭhenkhat erawh chaun nakkum kumtir leh kum laihawl lamah te an peihfel hman dawn niin an sawi thung. Khawvel pumah Covid-19 hri kai tawh zat hi mi 3,30,78,166 an awm tawh a, heng zinga mi 2,44,37,517 chu an dam leh tawh a ni.