Democrats-in party nominee atan Hillary Clinton puang

Philadelphia, US-a Democratic National Convention neih mekah, Thawhlehni zan khan November thlaa US President thlanna neih tura an party candidate atan Hillary Clinton-i an nominate. Clinton-i hi hmeichhe zinga US President thlannaa major party candidate hmasa ber a ni dawn a ni.

Party candidate atana nominate a ni chu lawmawm a tih thu Clinton-i chuan a sawi a, New York aṭanga a lawmthu sawina hi satellite hmang tihlan niin "Ka hlim em em a, ka tan hun duhawm tak a ni. He thil a thlen theihna atana theihtawp min chhuahpuitute zawng zawng chungah lawmthu ka sawi e. He hun lo thlirtu hmeichhe naupangte hnena ka sawi duh chu, US-a hmeichhe president hmasa ber ka ni thei mai thei a, in zinga mi pawh kha in la ni thei dawn a ni" a ti.

Party nominee ni tur hian convention-ah hian degelate mamawh zat 2,383 chu Clinton-i hian a tlin a ni. Amah thlawptu delegate-te chuan party nominee atana hmeichhia an thlang chu America ram tana bung thar kaina a ni thu an sawi. US-ah hian hmeichhiate hian kum 1920 aṭang khan vote an nei ve thei chauh a ni.

Clinton-i chuan President atana thlan tlin a nih chuan an rama mipui nawlpui sum lakluh inthlau lutuk chu siamṭhat a tum thu a sawi a, a khingpui Republican Party president candidate Donald Trump chu Oval Office luah tur chuan a rilru a nghet tawk lo niin a sawi. Mahse America mipuite ngaihdan lak hnuhnung berah chuan politics lama hnuhma la nei lo, sumdawng hausa Donald Trump hian Clinton-i hi a um chak hle a, Clinton-in hian point 2 chauhin hma a hruai tawh a ni.

Conventionp-ah hian Clinton-i pasal, US President hlui Bill Clinton pawh ilanin thu a sawi a, a nupui fakna thu a sawi. Bill Clinton chuan an ram mipui≠te humhalhna atan te, firfiaka chetna beihletna leh human rights chawikanna kawngah a nupui chu mi ṭangkai tak a nih thu a sawi a, President Barack Obama'n al-Qaida firfiak pawl hotu Osama bin Laden umzuina tura thutlukna a siam pawh khan Hillary chuan a lo thlawp tlat a ni, a ti.

Democrats party candidate chuh tuma a tawpa thlenga Hillary Clinton-i nena inbei, Bernie Sanders chuan Clinton-i hi a thlawp thu sawiin, Thawhlehni zan pawh khan party nominee atana rawn rawttu a ni. Mahse Sanders-a thlawptu eng emaw zat chuan Clinton-i nomination hi an pawmpui thei lo a, convention neihna hmun
aṭang hian an chhuak a ni.