France-a biak-in beitute chhui chiang

France rama Rouen khaw daia Saint-Etienne-du-Rouvray Biak-In beitu mi pahnihte chu chhui chian mek an ni a, pakhat zawk, Adel Kermiche (19) hi nikum khan Islamic State (IS) firfiak pawl zawm tura Syria kal a tum avangin ṭum hnih man a lo ni tawh a ni.

Thawhlehni khan Adel Kermiche leh a thurualpui pakhat chu chemte kengin Saint-Etienne-du-Rouvray-a Catholic Biak-Inah Mass an hman laiin an lut a, inkhawm ṭhenkhat chu an tlanchhuak hman a, mi pali chu an hreng zui a ni. Misual pahnihte hian an hren zinga pakhat, Father Jacques Hamel chu a ngawngah chema zaiin an that a, midang pakhat pawh chemin na takin an hliam bawk. Father Hamel hi kum 80 chuang a ni tawh a, mite ngainat hlawh tak a ni. Kut an thlak lai hmutu, Sister Danielle-i chuan mi pahnihte hian Father Hamel hi an ṭhingṭhit luih tir a, an khawih tur a lo inveng chu bei zuiin an that zui ta niin a sawi. Hemi hnu hian misual pahnihte hian biak-in chhunga maicham bulah chuan Arabic ṭawngin thu te an sawi zui a, an thusawite chu anmahni vek chuan an record niin a sawi.

Biak-In aṭanga tlanchhuak hman zinga pakhat chuan police-te hnenah thil awmdan a hrilh a, police-te chuan an mi hrente chhanchhuah tumin an bei nghal a ni. Misual pahnihte hian police-te laka him tumin an mihrente chu inphenna atan an hmang a, police-ten an kahhlum hma hian 'Allahu Akbar' tiin an au nia sawi a ni.

Biak-in beitu leh puithiam thattu pahnih zinga pakhat zawk, Adel Kermiche hian nikum March thla khan a unaupa ID hmangin Syria-a kal a tum a, a chhungten a bo nia an report hnuah Germany-ah man a ni. France-ah thawnhaw a nih hnuin, hemi kum vek May thla khan Syria pan a tum leh a, Turkey thleng a kal hman a, mahse man leh niin France-ah vek hruai haw leh a ni. Kumin March thla thleng khan hren a ni a, hemi hnu hian intiamna nen chhuah a ni a, a chetvel dan hriat theih nan electronic surveillance tag vuahtir a ni.

Kermiche-a thurualpui hi a nihna tak hriat≠chian a la ni lo a, investigator-ten an chhui mek.

Pawikhawihna thleng vang hian France President Francois Hollande chuan Prague-a a zin tur pawh a ṭhulh a, nimin khan sakhaw hruai≠tu hrang hrang, defence offiical leh minister-te meeting a neihpui a, an ram himna chungchangte a sawipui a ni. Hollande chuan, "IS chuan kan laka indo an puang a, he indona hi kan hneh ngei dawn a ni" a ti.