Israel-in Palestinian mi 52 man

Israel police-te chuan East Jerusalem-a pawikhawihna thila inhnamhnawihte dapchhuah hna an thawhnaah Palestinian mi 52 an man.

Police thupuangtu, Luba Samri chuan Thawhlehni leh Nilaini khan Israel police leh border guard 700 velin East Jerusalem-a Palestinian-te chenna, Issawiya leh Ras al-Amud hi an dap niin a sawi. An mi mante hi pawikhawihna thila inhnamhnawiha hriatte bakah, Israel mite lunga ṭawng ṭhin leh, vantlang punkhawma buaina siam zawnga che te, ruihhlo zuar ṭhinte nia sawi an ni.

Mi 52 man an nih bakah, police-te chuan Palestinian mi 28-te chu thu zawhchian turin an ko bawk.

East Jerusalem-a beihpui thlaknaah hian National Insurance Institute, Jerusalem Municpality sanitation and environmental services department leh Israeli Tax Authority aiawhte pawh an tel.

Samri chuan beihpui an thlak hi kumina a ṭum thumna a nih thu a sawi, hei hi dan kalha chetna thleng ṭhin venna atan te, infrastructure tihchangtlunna atan leh khua leh tui ṭhate rawngbawlsakna atana ti an nih thu a sawi. "Beihpui thlakin a tumber chu pawikhawihna leh mipui nunphung tibuai zawnga che ṭhinte dapchhuahna a ni" a ti. East Jerusalem-ah hian Palestinian mi 300,000 vel an awm mek.

Kum 1967 Mideast War-ah khan Israel chuan East Jerusalem bakah West Bank, Gaza Strip leh Golan Heights ramte a luahsak a ni. Kum 1981-ah khan East Jerusalem chu a siambelh a, hei hi international community lam chuan dan kalh tiin an sawisel reng a ni.

East Jerusalem-a cheng Palestinian-te chuan enkawlna an dawn ṭhat loh bakah infrastructure lam pawh a chhe hle. Palestinian mi 82% vel hi mi rethei tak tak an ni a, an zingah hian pawikhawihnaa inhnamhnawih ṭhin an tam hle. Palestinian mite hian in thar sakna turin municipality aṭangin phalna an hmu ṭha thei lo a, hei vang hian in sak lam thlengin harsatna an tawk a ni. Hetihlai hian municipality chuan phalna nei loin in sak 20,000 vel a awm niin a sawi. Tunkar tir lam khan Israel thuneitute chuan East Jerusalem-a Kalandia leh Issawiya-ah Palestinian-ten dan lo in an sak 20 chu a lo tih≠chhiat sak tawh a ni.