Turkey sorkar paih-thlak tumnaah sipai 8,651 inhnamhnawih

Turkey sorkar chuan sipai chakna hmanga sorkar paihthlak tuma beihnaah khan sipai 8,651 an inhnamhnawih niin a sawi a, hei hi Turkey Armed Forces pum aṭanga 1.5% an tling.

Turkish General Staff chuan sorkar paihthlak tuma an beihnaah sipaite hian jet 35, armored vehicle 239, helicopter 37, tank pathum leh lawnglian pathum an hmang tih a sawi. Sorkar paihthlak tuma beihnaa a bultumtu bera puh, US-a khawsa mek Islamic scholar Fethullah Guen bakah Guen nena inzawmna nei nia sawi, Zaman media group-a executive hlui 47-te manna tur thupek pawh tihchhuah a ni tawh bawk. Turkey sorkar chuan Guen hi an rama thawn turin US hnenah ngenna a siam tawh a ni.

Guen nena inzawmna neite dahchhuah hna hi ngawrh taka thawh leh a ni a, army general 87, air force general 30, admiral 32 te chu ban an ni tawh a, officer 1,099 leh junior officer 436 pawh bantir an ni. Hei bakah hian news agency pathum, television station 16, radio station 23, newspaper 45, magazines 15 leh publisher 29-te pawh titawp tura thupek tihchhuah a ni tawh bawk.