Venezuela sahuana ramsa rilṭamin an thi

Venezuela khawpui, Caracas-a Carifuoa sahuan-a ramsa awm zinga 50 vel chu thla ruk kalta chhung khan ei tur khawpkham an hmuh loh avangin an thi nia sawi a ni.

Sahuana awmte ei tur pek zat hi tihtlem sak an ni a, state park-a hnathawktu pawl hotu, Marlene Sifontes chuan ramsa ṭhenkhat chu kar hnih chhung ei tur pek loha an awm hnuah rilṭamin an thi niin a sawi. He sahuana sakei leh sakeibakneite hnena sa an pek ṭhin chu thlak sakin, an chaw atan theihai leh mai te an pe niin a sawi bawk.

Mahse sorkar chuan ramsa thih chhan hi chaw ei tur pek loh vang a ni lo tih a sawi thung.

Hetihlai hian khawpui danga sahuanah pawh ramsa te chaw tur hi an indaih lo hle, sumdawngte hnenah ramsa te ei tur thei, thlai leh sa te an khawn a ni. Paraguana sahunah chuan May thla khan ramsa pathum chu rilṭamin an thi nia sawi a ni a, he sahuana savawm paruk pawh nitina ei tur an pek
ṭhin chu a chanve-ah tihniam sak an ni tawh bawk.

Venezuela ram hian sum lamah harsatna nasa tak a tawk a, ei leh in lamah pawh indaih lohna a nasat bakah thil man a sang chak hle. President Nicolas Maduro chuan an ramin sum lama harsatna a tawh mek chu sumdawng lian leh eptu pawlte vang niin a sawi.