Nepal-a tuilian leh leiminah mi 64 an thi

Nepal rama ruahsur nasa avanga tuilian leh leiminin chhiatna a thlenah mi 64 an thi a, mi sang chuang chenna nei loin an awm tawh bawk.

Ruahsur nasa vang hian lui hrang hrang an lian a, tuilian hian lei leh in te a hnawl chhe nasa hle. Nepal khawthlang lam, Pyuthan disctrict-ah ruang 10 chhar belh a nih hnuin, police-te chuan chhiatna thleng vanga thi hi mi 64 an tling tawh tih an sawi.

Tuilian leh leimin hi district 14 in an tuar mek a, heng zingah Pyuthan district hi a tuar nasa ber zinga mi a ni a, he district-ah hian mi 36 in nunna an chan tawh a ni. Nikuma an rama lirnghing na takin in tam tak a tihchhiat avangin tun thlengin Nepal mi sing tel chu puan-ina a la khawsa mek a ni a, thi zinga a tam zawk hi puan-in la chengte hi an ni.

Tinau lui lianin Butwal-13 lei a lak vangin mi 6,000 te chuan dinhmun harsa tak an tawk mek a, Mechi lui chu India ram lamah a lian bawk.

Nepal sorkar chuan chhiatna tawkte chhan≠chhuah leh chhawmdawl hna hi a thawk mek a, sipai leh volunteer-ten rubber boat hmangin an hruai chhuak a, tlawhpawh theihloha awmte chu helicopter hmangin an ei turte an thlalsak bawk. Nepal sorkar chuan tuilian tuarte chhan≠chhuah leh chhawmdawlna pekna atan hian dollar maktaduai 7.4 a dah niin home ministry official-te chuan an sawi.