Pager leh walkie-talkie puak chungchangah Lebanon-in UNSC-ah lehkha a thawn

Lebanon rama tun kar Thawhlehni leh Nilainia pager leh walkie-talkie puak chungchangah UN-a Lebanon mission chuan United Nations Security Council (UNSC) ah lehkha thawnin, heng device te hi Lebanon rama thawn luh an nih hmain a chhungah puak thei thil hi phumruk vek an ni,a ti. UNSC hi nimin khan Lebanon-a device puak chungchangah emergency meeting a nei a ni.

Lebanon helpawl, Hezbollah ten inbiak pawhna atana an hman ber, pager leh walkie-talkie te chu an puak vak a, mi 37 in an thih phah bakah mi sang telin hliam an tuar phah bawk. Lebanon chuan he thil hi Israel tih niin a puh a, Israel lam chuan an tih a nih leh nih loh thu engmah an sawi lang lo thung. Mahse Lebanon security lam chuan Israel spy agency, Mossad te tih ngei niin an puh a, electronic message hmangin an ti puak niin an tarlang.

Hezbollah hruaitu, Hassan Nasrallah an pawl inbiakpawhna hmanrua beih a nih avangin Israel chu an chhang let ngei dawn tih a sawi a, Israel chuan a rin leh beisei lohna lamah beih let a tawk dawn a ni, a ti. Iran thlawp, Hezbollah pawl hian an device beih a nih hnu hian Israel hmar lama sipaite hmun chu ṭum 17 vel an kap niin an sawi.

Lebanon Health Ministry chuan device puak vanga hliam tuar zinga mi 1,300 te chu an dinhmun a ṭha lo hle tih a tarlang a, hei vang hian thi zat pawh hi an la pun chhoh a rinawm.

Israel-in Lebanon ah beihpui a thlak ṭan

Israel-in an ram hmar lam aṭanga beitu, Lebanon-a Hezbollah te lakah indona bi thar an ṭan dawn tih a puan hnuah, Israel indo thlawhtheihna hmangin Ningani zan khan Lebanon chhim lamte nasa taka beih a ni.

Israel Defense Forces (IDF) chuan Lebanon chhim lama Hezbollah pawl rocket launcher leh an pawl hmun 100 chuang an kap tih sawiin, heng zingah hian ralthuam an dahkhawlna hmunte pawh a tel. Hezbollah rocket launcher an kah chhiatsakte chu Israel kahna tura an tihte an ni tih an sawi bawk. Lebanon chhima IDF ten beihpui an thlak hi darkar hnih chuang a tling.

Nimin zing khan Israel chuan Golan Heights leh Israel hmarlam biala chengte pawn chhuah a khapna chu a hlip a, IDF chuan beihpui thil awmdan an la thlithlai zui zel dawn tih sawiin, tunkar tawp chhung chu silai ri leh thil puak ri an la hre fo mai thei niin mipuite pawh an hrilh lawk bawk.