Middle East-ah US indo thlawhtheihna leh lawngte inralring

Israel leh Lebanon helpawl, Hezbollah te inbeihna nasa chho avangin Middle East-a buaina lian zawk a chhuah hlauhthawnna a lian hle a, US pawhin buaina nasa zawk a chhuaha che chhuak thei mai turin a indo thlawhtheihna, lawng lian leh sipaite pawh a inralrin tir tawh a ni.

US hian Middle East pum tuam turin, US Central Command-ah sipai 34,000 vel a dah ṭhin. Mahse Israel-Hamas indona a chhuah hnuah sipai hi 40,000 velah tih pun niin, lawng leh indo thlawhtheihna te pawh thawn luh tel an ni tawh bawk.

USS Abraham Lincoln leh destroyer pathum chu Gulf of Oman-ah dah an ni a, US Navy destroyer pahnih chu Red Sea-ah dah an ni bawk. USS Georgia guided missile submarine pawh thla hmasa khan Red Sea-ah dah niin, US Central Command kutah a la awm a, mahse official-te chuan a awmna lai tak erawh an sawilang duh lo.

Mediterranean Sea khawchhak lamah hian US indo lawng lian paruk an awm mek a, heng zingah hian USS Wasp amphibious assault ship pawh a tel. F/A-18 fighter jet paruk chu Middle East-ah hian thawn luh an ni bawk a, mahse hei pawh hi a awmna tak an sawichiang duh lo a ni. Air Force chuan thla hmasa khan advanced F-22 fighter jet a thawn luh belh a ni.