Sri Lanka President thar thlang dawn

Sum leh pai lama harsatna nasa tawk mek, Sri Lanka chuan vawiin hian an president thar tur an thlang dawn.

President thar thlanna neihpui tur hian international election observation organisation aṭangin mi 116 tirh an ni a, an zinga mi 78 chu European Union (EU) ami an ni. EU hian ṭum ruk zet chu Sri Lanka inthlan neih hi a lo enpui tawh a ni.

National Election Commission chuan direct vote hmanga President thlanna turah hian vote nei mi mtd 17.1 chuang an awm tih sawiin, zing dar 7 aṭanga tlai dar 5 thleng vote hi thlak theih a ni dawn a, vote thlakna tur hi polling station 13,400 chuang siam a ni.

Candidate zingah president ṭanglai, Ranil Wickremesinghe, eptu pawl lian ber hruaitu Sajith Premadasa leh Marxist JVP leader Anura Kumara Dissanayake te a langsar deuhte an ni. Inthlan result hi Pathianniah tih chhuah a ni ang.

Tun ṭum hi kum 2022-a leiba ngah vanga harsatna nasa tak tawk a, ram chhunga nawrh huaihawt vanga President aṭanga Gotabya Rajapaksa paihthlak a nih hnuah inthlan an hmachhawnna hmasa ber tur a ni. Rajpasaka a ban hnu hian Wickremesinghe hian President dinhmun hi chelhin, International Monetary Fund (IMF) aṭanga an leiba khaichhuahna tur siamsak leh, an ram economy siamṭhatna turte a kalpui avangin an ram sum dinhmun pawhin tlemin ziawm lam a pan chho tawh a ni. Hetia an leiba ngah tihziaawmna tura chhiah tihsan a nih vak leh, subsidy tihtawp a ni erawh chuan mipui tam zawk tan phurrit nasa tak a thlen thung.