IS beihletna turin France-in Lebanon-ah ralthuam thawn lut
France sorkar chuan Islamic State (IS) firfiakte beihletna turin Lebanon-ah ralthuam a thawn lut ṭan ta. Ralthuamte hi Saudi Arabia bul tumin, dollar tluklehdingawn 3 man thawn a ni ang.
France Defence Minister Jean-Yves Le Drian leh Lebanon Defence Minister Samir Mokbel enpuina hnuaiah ralthuam hi Beirut-a air force base-ah thawn luh a ni a, a hmasa ber atan hian anti-tank guided missile thawn a ni.
Lebanon-ah hian combat and transport vehicle 250, Cougar helicopter 7, small corvette warship 3 bakah surveillance leh communication equipment-te thawn luh a ni ang. France chuan heng ralthuamte hi kum li chhungin a thawn dawn a ni. Ralthuam thawnluhte hi Saudi Arabia-in a senso a tum vek ang.
Ralthuam thawn luhna tura contract siamah hian Lebanon sipai 70,000 te kum sarih chhung training pekna tur leh, kum 10 chhung an hmanruate enkawlpuina turte pawh a tel.
France defence official chuan Lebanon sipaite tuaithar a, an ram himna tiderthawn thei thilte pawh chhang let thei tura thuam chak chu an tum ber a nih thu a sawi.
Hetihlai hian IS firfiak leh Iraq sipaite chu Iraq-a Ramadi khawpui bulah nasa takin an inbei chhunzawm zel a, an inbeihna avang hian chhungkaw 4,000 chuang chuan Ramadi khua hi an tlanchhiatsan tawh.