Saudi Arabi-in Yemen puihna tur sum pe dawn

Saudi Arabia chuan Yemen rama sorkar laka hel, Houthi helpawl a beihna chu chhunzawm zel a tum thu leh, Yemen tualchhung buaina thleng mek tuarte chhawmdawlna tura United Nations-in dollar maktaduai 274 a ngai dawn tia a sawi pawh pek vek a tum thu a sawi.

March 26 aṭanga Yemen tualchhung indona thleng vang hian civil mi tam tak an thi tawh a, mi sing tel chu hmun him lamah an tlanchhe tawh bawk.

Yemen President-in pui tura a ngen angin Saudi Arabia kaihhruai Arab ram ṭangrualte chuan Houthi helpawl lakah hian beihpui thlakin, an hmun pawimawhte ṭum eng emaw zat an bomb sak tawh a ni.

UN Humanitarian Coordinatoar Johannes Van der Klaauw chuan hun eng emaw chen tual­chhung indona a thlen tawh avang­in chhung­kaw tam tak chu nitin khawsakna atana mamawh- tui, chaw leh fuel lam thlengin an tlachham ṭan tawh a ni, a ti. Hetihlai hian Arab ṭangrual ramte hian an airspace leh port-te an khuah­khirh avangin indona tuartu mipuite chhawmdawlna tur pawh a lut ṭha thei lo niin a sawi.