Hezbollah ten rocket-in Israel hmar lam kap Israel-in a chhang let ve nghal

Lebanon helpawl, Hezbollah chuan Inrinni, September 21, 2024 zan khan rocket eng emaw zatin Israel hmar lam an kap a, Israel chuan chhang let ve nghalin Hezbollah hmun pawimawhte an kap fuh tih an sawi.

Hezbollah rocket kah hi ṭum dang aiin Israel ram chhung an lut thui a, an sipai hmunte beih an tum niin an sawi. Mahse sipai hmun erawh a fuh lo a, chenna in ṭhenkhat chhia erawh a awm nia tarlan a ni.

Israel sipaite chuan Hezbollah te chu vau nghalin, nasa takin helpawl lakah beihpui an thlak dawn tih an tarlang. Nimin zing khan Israel hmar lam hmun tam takah mipuite inralring tura hriattirin siren tih rik a ni a, Israel Defence Force (IDF) chuan Inrinni zana Hezbollah-ten an ram beihna tura rocket an kah chhuah chu 100 chuang zet niin, nimin zingah 85 an kap leh bawk tih an sawi. IDF in Hezbollah te an chhan letna hian eng ang chhiatna nge a thlen kimchang erawh an tarlang lo.

Nimin zing vek khan IDF chuan Israel hmarlam leh, a ram luah Golan Heights hmun tam zawkah Hezbollah te beihna thleng thei laka mipuite himna turin khuahkhirhna an siam a, pawn lamah mi 10 aia tam awmkhawm lo turin an ti. Hetih lai hian venhimna hnuaia an awm chuan zirna hmun leh hnathawhna hmunte chu dan pangngai anga kal chhunzawm a phalsak thung.

Israel leh Hezbollah inbeihna thleng chho zel avangin Beirut-a US embassy chuan US mi leh sate chu Lebanon chhuahsan turin a hriattir. A awm luite chu an ngaihsak chhunzawm thei lo maithei tih a sawi nghal bawk. Jordan ram pawhin Lebanon-a an mi leh sa awmte chu a rang thei ang bera chhuak turin a chah tawh bawk.

West Bank-a Al Jazeera office khar tir

Israel sipaite chuan Ramallah, West Bank-a news broadcaster, Al Jazeera office chu an dap hnuah, ni 45 khar turin a hriattir.

Nimin zing khan Israel sipaite hian Al Jazeera office hi an luhchilh a, live broadcast neih laiin network West Bank bureau chief, Walid al-Omari hnenah khar tura thupek hi pein ani hian a chhiar chhuak nghal bawk a ni.

Israel hian Qatar-a hmunpui nei, news broadcaster hi an ram himna dinhmun tiderthawng thei nia sawiin kumin May thla khan Nazareth leh East Jerusalem-a an office chu a lo dapsak tawh bawk. Israel chuan he network hi firfiakten an hman ṭangkai ṭhin niin a lo sawi fo a, mahse Al Jazeera chuan an puhna hi a pha thung.

Kumin April thla khan Israel Parliament chuan sorkar hnenah indona an hmachhawn laia an ram himna tiderthawng leh ti chhe thei nia hriat, foreign broadcaster-te khar tir turin thuneihna chu a lo pe tawh a ni. Kharna tura thupek pek hian ni 45 chhung zel a awh ang a, mahse he thupek hi pawhsei theih zel a ni thung ang.