Sri Lanka President thlan thawh hnihna nei

Sri Lanka President thar tur thlanna, September 21, Inrinnia neihah candidate zingah tling tura vote hmuh ngai zat hmu pha an awm loh avangin, nimin khan candidate zinga vote hmu sang pahnihte chuan inthlan thawh hnihna an hmachhawn leh.

President ni tur hian vote tla aṭanga 50% hmuh phak a ngai a ni. Inrinnia vote thlakah khan National People’s Power (NPP) candidate, Janatha Vimukthi Peremuna (JVP) party hruaitu Anura Kumara Dissanayake chuan vote hmu sang berin 39.52% a hmu a; eptu pawl Samagi Jana Balawegaya hruaitu, Sajith Premadasa chuan vote 34.28% hmuin a dawt a ni. Anni pahnih aṭang hian nimin khan President thar tur hi thlan a ni leh ta a ni. President ṭanglai, Ranil Wickremesinghe chu vote hmu sang pahnih zingah a tel pha lo a, vote 17% chauh hmuin pathumna a ni. Tun ṭum hi Sri Lanka President thlanna neih tawhah vote thlak thawh hnihna neih a ngaih ṭum khatna a ni.

Nimina inthlan thawh hnihnaah hian Anura Kumara Dissanayake chuan hma a hruai a, vote tla chhiar tawh chinah 53% vel a hmu tawh a ni. JVP party hian Parliament-ah seat thum chauh nei mah se, an party hruaitu kum 55 mi, Dissanayake hian eiruk umbo leh, an ram mi rethei leh harsa zawkte khaichhuahna policy kalpui chu a auhla berah a hman avangin mipui nawlpuiah a tla na hle. Thlan a nih chuan an ram dinhmun siamṭhat a, policy tharte kalpuina tura an ram inthlanpui buatsaihna turin ni 45 chhunga Parliament ṭhiah a tiam a ni.