US-a inpawng kahna thlengah mi 4 an thi

US-a Birmingham, Alabama state-ah Inrinni zan khan inpawng kahna a thleng leh a, mi pali an thi a, hliam eng emaw zat an awm.

Birmingham police officer, Truman Fitzgeral chuan pawikhawihna thlenna hmun hi Five Point South area a ni tih sawiin, Inrinni zan rei lamah khan heng hmuna awmkhawmte chu silai kengten vawi eng emaw zat an pawng kah a ni, a ti. Pawihkhawihna hmunah hian mipa pahnih leh hmeichhe pakhat an thi nghal a, hliam tuar damdawi-in panpui zinga pakhat chu a hnuah a thi ve leh a ni.

Pawikhawihtute hi hriat an la ni lo a, police-ten chhui mekin rinhlelh man pawh an la nei lo tih Fitzgeral chuan a sawi bawk. Five Points South district hi zan lama lun tak niin, inkahna hi Magnolia Avenue hmunah a thleng a ni.

US-ah hian inpawng kahna hi a thleng fo a, kuminah ringawt pawh ṭum 400 zet a thleng tawh niin Gun Violence Archive chuan a tarlang. Inpawng kahna ah hian silai hmehpuahah mi pali emaw, a aia tam emaw thi leh hliam an awmna chin a huam a ni.