Netanyahu-a'n Lebanon mite tana thuchah ti chhuak

Israel-in Thawhṭanni zana Lebanon-a beihpui a thlaknaa mi 500 dawn an thih hnuah, Israel prime minister Benjamin Netanyahu chuan Lebanon mipuite tana thuchah a tichhuak a, civil mite chu Hezbollah helpawl mi leh saten an sahimna tura an inphenna atana awm lo turin a chah.

Netanyahu chuan nimin khan video message hi ti chhuakin, Israel chuan Lebanon mite a do lo a, Hezbollah mi leh sate a bei zawk a ni tiin, helte hian an inah missile te an thukru niin a sawi. Israel mipuite himna turin heng ralthuamte hi tih chhiat zel an tum tih a sawi.

Israel PM chuan, "Hun rei tak chhung Hezbollah hian inphenna atan an hmang tawh che u a ni. In inah leh garage-ahte rocket leh missile te an dah a, heng ralthuamte hi khawpui leh kan mi leh sate beihna atan an hmang a ni. Hezbollah beihna laka kan mite venhimna turin an ralthuamte hi kan tih chhiat a ngai a ni," a ti.

Israel Defence Force (IDF) chuan beihpui an thlak hmain Lebanon mipuite chu hmun him lama insaseng turin an hriattir lawk a, hei hi an ngaih pawimawh a ngai a ni tiin, Hezbollah te vangin an nunna chu dinhmun derthawnga dah lo turin a chah bawk.

IDF hian Thawhṭanni, September 23 zan khan Hezbollah lakah beihpui thlakna, 'Operation Northern Arrows' kalpuiin, Lebanon chhim lam leh khawchhak lama helpawl hmunte a bei a ni. Hmun 800 vel a kap fuh nia sawi a ni. Hezbollah chuan Israel beihna avang hian mi 492 an thi a, an zingah hian hmeichhia 58 leh naupang 35 an tel niin an tarlang. Hliam tuar mi 1,645 awmin, chhungkaw sang telin an in leh lo an chan bawk niin an tarlang.

Lebanon-a Israel beihpui thlak hi Arab ram leh khawthlang ramte chuan an dem thu an sawi a, Israel leh Hezbollah chu an inbeihna te titawp a, inremna siam dan kawng zawng turin an nawr. Mahse ram dangte ngenna hian awmzia a nei rih lo a ni.