Pakistan ISI hotu thar tur ruat

Pakistan spy agency, ISI hotu thar atan Lt Gen Muhammad Asim Malik ruat a ni a, prime minister hlui Imran Khan-an ISI hotu atana a ruat, Lt Gen Nadeem Anjum thlakin September 30 aṭangin a hna thar hi a zawm ang.

ISI director general thar atana ruat, Lt Gen Muhammad Asim Malik hi US-a Fort Leavenworth leh London-a Royal College of Defence Studies aṭanga zir chhuak a ni a, chawimawina Sword of Honour pawh a dawng tawh a ni. Islamabad-a National Defence University-ah chief instructor a ni tawh a, Quetta-a Command and Staff College-ah pawh a thawk tawh bawk. October 2021 khan Adjutant General ah a kaisang a, hei hi tun thlengin a la chelh a ni.

Pakistan ISI hotu lu ber dinhmun hi a pawimawhin thuneihna sang tak a nei a, he dinhmun chelh tur hian Prime Minister hnenah army officer ṭanglai hming pathum thehluh niin, heng aṭang hian thlan chhuah a ni ṭhin.