Myanmar sipai sorkarin activist 2 a ti hlum niin puh

Rights group, Women’s Peace Network chuan Myanmar sipai sorkar chuan sipai rorelna dodaltu, anti-coup activist pahnih a ti hlum a, mi dang panga pawh tih hlum a la tum niin a tarlang. He thil thleng vang hian ram dangte chu hma la vat turin a ngen bawk.

Women’s Peace Network chuan thuchhuah siamin, September 23, 2024-a Myanmar huna zing dar 4-ah Maung Kaung Htet leh a nupui, Chan Myae Thu chu sipai sorkarin a ti hlum tih an sawi. An nupa hian kum 2022, October thlaa Yangon-a Isen Prison parcel bomb hmanga beih a nihnaah inhnamhnawiha puh an ni a, an thubuai ngaihtuah a nih dan pawh a fel hlel hle tih sawiin thiam loh chantir an ni, a ti. Anni nupa bakah hian pro-democracy activist dang panga - Kaung Pyae Sone Oo, Zeyar Phyo, Hsann Min Aung, Kyaw Win Soe leh Myat Phyo Myint chu tih hlum an la tum bawk niin an tarlang. Heng mi pangate hi September, 2021 khan Yangon rel-a police officer pali kahhlum thubuaiah thiam loh chantir an ni a, May 2023 aṭang khan tan-inah dah an ni tawh a ni.

ASEAN Parliamentarians for Human Rights (APHR) chuan Myanmar tualchhung buaina a reh theihna tura palai hna thawktu, Association of Southeast Asian Nations (ASEAN) chu ṭawng chhuak turin a ngen.

APHR chairperson, Mercy Chriesty Barends chuan ASEAN foreign minister-te chuan tang tih hlum an nih chungchangah hian an duh loh zia an lantir a ngai a ni tiin, tih hlum tura thiam loh chantirte hian an thubuai ngaihtuahnaah pawh puitu an nei mumal lo niin a sawi.