US President election : Kamala Harris in hma a sawn zel

US president thar thlanna, kumin November-a neih tura mipui ngaihdan lak thar berah Democratic candidate, Kamala Harris chuan a khingpui, Republican candidate Donald Trump lakah hma a la hruai zel.

NBC News-in September 13-17 chhunga mipui ngaihdan a lakah, Harris hian Trump lakah 5% in hma a hruai. Harris duhtu hi 49% an awm laiin Trump thlawptu hi 44% an awm thung a, an inthlauhna hi 5% a nih laiin 5% error a awm bawk a, hei vang hian an inthlauhna hi tarlan ai hian a tlem zawk thei niin an sawi.

CBS News poll, September 18 - 20 chhunga buatsaihah pawh Harris hian Trump lakah 4% point in hma a hruai bawk. Poll dangah pawh Harris hian hma hruai mah se, swing state-ah chuan an inthlauhna erawh a tlem hle.

November 5, 2024-ah President thar hi thlan a ni dawn a mahse state ṭhenkhat chuan vote thlak hun an hawng ṭan tawh. Early voting hi Minnesota, South Dakota leh Virginia chuan kalpui tawhin, October thlaah state dang pawhin an ṭan rin a ni bawk.