Hong Kong Democracy activist man

Hong Kong police-te chuan democracy activist Joshu Wong chu kum 2019 October thlaa phalna nei loa punkhawmna buatsaiha puhna leh,  anti-mask law palzuta puhna chungchangah Ningani khan an man.

Kum 23 mi, Wong leh a thawhpui activist dangte chu nikuma democracy tundin phuta nawrh an huaihawt chungchangah dan loa thiltia puhna thubuai eng emaw zat siamsak an lo ni tawh a ni. Democracy activist-te nawrh huaihawt ṭhin vang hian China chuan Hong Kong tan national security law siam tharin, kumin June thla aṭang khan hman ṭan a ni. 

Britain chuan Wong man a ni hi a dem thu a sawi nghal a, foreign secretary Dominic Raab chuan Hong Kong thuneituten activist-te an bitum reng chu ngaihmawhawm a tih thu sawiin, kum 1997-a Britain-in China hnena Hong Kong a hlan ṭuma Joint Declaration an lo siam tawh chu zah turin a ngen. Raab chaun China leh Hong Kong thuneitute chu mipuite dikna chanvo leh zalenna te zah tura an phut thu a sawi. 

Wong hi kum 17 mi a nih lai,  kum 2014-a zirlaite kaihhruaia Umbrella Movement democracy protest huaihawt a nih aṭangin hriat lar ṭan a ni a, Hong Kong inrelbawlnaa China inrawlh leh a awpbeh dante duh loin nawrh a lo huaihawt fo tawh a ni.