Russia eptu hruaitu Navalny account hrek sak
Russia eptu hruaitu Alexey Navalny bank account chu khawih chet theih loha hrek sak a ni a, Moscow-a a apartment pawh man sak a ni bawk tih a thupuangtu Kira Yarmysh chuan a sawi.
Navalny hi August thla khan thlawhtheihnaah tura hrai niin nikhaw hre loin a awm a, Russia aṭangin Germany-ah enkawl tura hruai a ni. Berlin-a Charrite hospital-a enkawl a nih hnuin Nilaini khan damdawiin
aṭang hian chhuah tir a ni tawh. Mahse a hriselna dinhmun hi enzui a la ngaih avangin Germany-ah hian a la awm chhunzawm rih ang.
Yarmysh chuan Moscow Schoolchild catering company-in thubuai an thehluh kaihhnawihah August 27 khan Navalny thil neihte hi hrek sak a ni tih a sawi. Navalny leh a thawhpuite hi he company nen hian hun rei tak an lo intithiam lo tawh a ni.
Khawthlang ramte chuan Navalny tura hrai a nih chung changa thil thlen dan sawifiah turin Russia sorkar an phut a, mahse Russia chuan he thil thlengah hian inhnamhnawihna a neih loh thu leh, Navalny hi tura hrai a ni ngei em tih finfiahna pawh ala hmuh loh thu a sawi thung.