IS-te'n Ethiopian Kristian 30 lu an tansak

Islamic State (IS) firfiakte chuan video tichhuak thar lehin, hetah hian Libya ram Wilayat Barqa tuipui kama Ethiopian Kristian 30-te kaphlum a, an lu an tansak lai tihlan a ni.

Kristian an tihhlum hi eng hun lai nge tih hriat a ni lo a, mahse video hi Pathianni khan social media site-ah an dah­chhuak a ni.
Firfiakte video tih­chhuah thar hi a tak nge siamchawp tih finfiah theih a la ni lo a, mahse video an tihchhuah tawha an mi mante an tihhlum dan nen an inang hle.
Video-ah hian firfiakte hian Kristiante chu 'crusader' tia koin, Muslim-te tihlum tura thawk chhuak an ni, a ti. Firfiak zinga 15 te chuan tuipui kamah hian an mi man zinga 15 te lu an tansak lai tihlan a ni a, hetihlai hian a dangte chuan an mi man dangte chu an lu-ah an lo kap bawk. He video subtitle-ah hian 'worshippers of the cross belonging to the hostile Ethiopian church' tih an hmang.
Ethiopia sorkar chuan firfiakte'n an tihhlumte hi an ram mi leh sate an ni ngei em tih an la finfiah thei lo tih an sawi a, hemi rual hian he pawikhawihna rapthlak tak hi an dem thu Ethiopia sorkar thupuangtu, Redwan Hussein chuan a sawi. Hussein chuan Libya ramah Ethiopia hian embassy nei lo mah se, Ethiopia mi Libya ram chhuahsan duhte chu theihtawpa puih an tum thu a sawi bawk.
US pawhin IS fir­fiakte chet dan rawng tak chu a dem thu sawiin, White House chuan, "Mi an sakhaw vawn avang ringawta firfiakte kut an tuar hian awmzia a nei loa, rawng taka chetna a ni," a ti.
IS firfiakte hian Iraq leh Syria ram hmun eng emaw zat an la tawh a, Middle East map siamṭhat an tum thu an sawi. Libya ramah hian firfiakte hi eng zat chiah nge awm hriat an ni lo a, Egypt security official-te chuan IS thu­thlung zawm­tu mi sang tel chuan kum 2013-a sipaite'n Egypt President Mohamed Morsi an paihthlak hnu khan Sinai Peninsula aṭangin Libya hi an lut niin an sawi.