Football khelhnaa buaina chhuak kaihhnawihah mi 11 thi turin hrem
Egypt court chuan kum 2012-a Port Said khawpuia football khelhnaa buaina chhuak kaihhnawihah mi 11-te chu thi turin an chungthu a rel. Port Said-a buaina chhuakah hian mi 73 an thi a, mi 1,000 chuangin hliam an tuar bawk.
Pathianni khan heng mi 11-te hi buaina chhuaka an inhnamhnawih avangin hremna pek an ni a, mahse court thutlukna hi Egpyt-a religous authority senior ber, Grand Mufti-in a pawm ve leh phawt a ngai ang. Hei bakah hian thiam loh chantirte hian an appeal leh thei bawk a ni.
Kum 2012 khan Port Said Stadium-a Egyptian Premier League football match, Al-Masry leh Al-Ahly team-te'n an khelh ṭumin, El Masry team fan-te chuan stadium stand leh pitch luhkhungin buaina an chawk chhuak a, El Ahly fan-te chu chem, bur, lung leh halpuah nen an bei a ni. He buaina chhuak vang hian mi 73 an thi a, Egypt sorkar chuan kum hnih chhung domestice league match a tihtawp phah bawk.