Yemen helte'n inpek mai an la tum lo

Yemen sorkar paihthlak tuma hel, Houthi helpawlte chuan Saudi Arabia kaihhruai­in Arab ṭangrual ramte chuan an laka beihpui thlak chhunzawm zel mah se inpek mai an la tum lo tih an sawi.

Helpawl hruaitu, Abdul-Malek al-Houthi chuan United Nations-in tharum thawhna titawp tura a ngenna chu hnawl­in, an ram khawpui Sanaa an lak hnua, President Abed Rabbo Mansour Hadi chu himna zawnga ramdanga tlanchhiat ngai khawpa an nawr chep tawh hnuah inhnuhhniam leh mai mai an tum lo tih a sawi.

Al-Houthi chuan, "Yemen mipuite hi an tlawm ngai lo a, an inpe dawn hek lo," a ti.

Houthi helte hian nikum September thla aṭang khan President Hadi kaihhruai sor­kar hi paihthlak tumin an bei tawh a, an ram khawpu Sanaa chu an thuhnuaiah an dah tawh bakah, lawngchawlh­na hmun pawimawh Aden khawpui pawh lak leh tumin an bei mek a ni. Houthi helte hi Zayidi Shiite-te an ni a, khawthlang ram leh Sunni Arab ramte chuan helpawlte hi Iran sorkar­in thlawpin, an sipaite pawhin an pui niin an puh.