Israel beihpui thlaknaah Hezbollah missile chief a thi

Israel-in Thawhlehnia Lebanon khawpui, Beirut chhim lam daia airstrike a neihah Hezbollah missile division hotu, Ibrahim Qubaisi a thi tih an pawl chuan an puang.

Ibrahim Qubaisi hi Israel sipaiten Beirut khawdai, Dahiyeh an beihnaah a thi tih hi Israel Defence Force (IDF) pawhin an nemnghet bawk. IDF chuan kum tam tak chhung Hezbollah pawlin missile hmanga Israel an beih ṭhinna buaipuitu ber a ni tih sawiin, Qubaisi bakah Hezbollah high-ranking commander pahnih an thi tel bawk niin a tarlang.

Hezbollah pawhin Qubaisi thih thu hi puangin, Israel sipaiten an beihna avanga an mi leh sa thi an sawina, 'martyr on the road to Jerusalem' tiin an tarlang.

Qubaisi hian kum 1980 chhoah khan Hezbollah pawl hi a zawm a, missile leh rocket unit te a enkawl a, Hezbollah ten Isarel sipaite an beih ṭhinnaah pawh a inrawlh thuk hle. Kum 2000-a Mount Dov operation an neihah khan a phusa ber niin, hemi ṭum hian Israel sipai pathum an man a, a hnuah an ruang hi hmuh niin kum 2004 khan Israel hnenah hlan an ni.

Lebanon Health Ministry chuan Thawhlehnia Dahiyeh-a Israel airstrike neihah civil mi paruk an thi tel a, hliam 15 an awm bawk niin a tarlang.

United Nations secretary-general Antonio Guterres an Lebanon chu chhiatna rapthlak tak hmachhawn mai thei dinhmunah ading mek tih sawiin, US president Joe Biden pawhin Israel leh Hezbollah chu buaina nasa zawk thlen tir lo turin a ngen bawk.

Hetih lai hian Israel prime minister Benjamin Netanyahu chuan Lebanon-a Hezbollah hmun chu an bei chhunzawm zel dawn tih a sawi a, Hezbollah missile lo thuhruk saktu in pawh an kap chhe zel dawn tih a sawi a ni.

Hezbollah-in missile in Mossad hmunpui kap

Lebanon helpawl, Hezbollah chuan Tel Aviv khawpui bula Israel intelligence agency, Mosad headquarters chu ballistic missile in an kap tih nimin, September 25 khan an sawi. Mahse Israel air defence systems chuan surface-to-surface missile hi lo hmuin, a lo kap thla a ni.

Lebanon missile an lo kahthlak sak hnuah hian Tel Aviv khawpuiah chuan warning siren tih rik a ni zui bawk.

Hezbollah chuan an beih tum building chu an pawl mi leh saten inbiakpawhna atana an hman, pager bakah wireless device tihpuah a nihna tura Israel intelligence agency in ruahmanna a siamna hmun a ni, an ti. Iran thlawp helpawl hian nikum October hnua ballistic missile hmanga Israel an beihna hmasa ber a ni.

Israel sipaite pawhin Lebanon aṭanga projectile kah chhuahin Israel ram laili a thlenna hmasa ber a ni tih an sawi bawk a, mahse an lo kah thlak avangin thil tihchhiat engmah a nei lo a, central Israel-a venhimna kalpui dan pawh thlak danglam a ni chuang lo tih an tarlang.