Pope-in Vatican-a Suu Kyi awmna ngaihtuahsak a rawt

Pope Francis chuan Myanmar ram hruaitu, sipai sorkarin jail-a a khung mek, Aun San Suu Kyi chu Vatican territory-ah a inhumhimna tur lo ngaihtuah sak a rawt niin Italy media chuan Thawhlehni khan an tarlang.

Tun thla tir lama Asia a tlawh ṭuma Jesuits te nena meeting an neih ṭumin Pope hian he thu hi a sawi a," Aung San Su Kyi chhuah zalen tur hian ka ngen a, Rome-ah a fapa pawh ka hmu tawh bawk. Vatican thuneitute hnenah pawh kan ram chhunga inhumhimna ngaihtuahsak turin ka rawt a ni," a ti.

Pope thusawi chungchang hi 'The Corriere della Sera' nitin chanchinbua Italian puithiam, Antonio Spadaro article-ah a lang a ni. Pope chuan, 'Myanmar rama thil thleng mek chungchangah hian ngawi reng thei kan ni lo a, hma kan lak a ngai a ni," tiin mitinte zahawmna leh dikna chanvo neihte chu inzahtawn sak a, democracy kalphung chu zah a, boruak ṭha leh muanawm tak hnuaia an awm a ngai tih a sawi.

Aun San Suu Kyi hi kum 79 mi a ni tawh a, sipai sorkarin an man hnuah hian thubuai eng emaw zat siamsakin thiam loh chantir a ni a, a thubuai hrang hrangah hian kum 27 chhung lungin tang turin hrem a ni tawh.

Suu Kyi-i fapa, Kim Aris chuan Pope-in jail aṭanga chhuah tur leh, Vatican-a a inhumhimna tur siamsak a rawt chungchangah a nu chu a lawm hle a rin thu a sawi a, mahse sipai sorkar chuan Pope rawtna hi an ngaih pawimawh erawh a rinawm loh tiin a sawi zui bawk.