Pope-in Ethiopian Kristiante Thah an nih dan a dem

Islamic State (IS) firfiakte'n video an tih­chhuah thar berah, Libya ram tuipui kama Ethiopian Kristian 30-te tihhlum an nih lai a tichhuak a, he thil thleng hi ram hrang hrang hruaitute bakah, Roman Catholic kohhran hotu lu, Pope Francis chuan a dem takzet tih a sawi.

Pope chuan IS fir­fiakte'n Kristiante an that chhunzawm zel chu a dem thu a sawi a, Africa, Middle East leh Asia ram ṭhenkhata Kristian an nih avanga rawng taka tihhlum tuartu, martar an awm chhunzawm reng chu pawi a tih thu leh, an ṭana a ṭawngṭaisak thu a sawi.

Ethiopia sorkar chuan IS-te video tihchhuah thara an tihhlumte chu an ram mite ngei an ni tih sawiin, pawisawilote rawng taka tihhlum an ni chu a dem thu a sawi. Firfiak kuta thite sunna hi nimin aṭang khan ni thum chhung Ethiopia ram pumah hman a ni.

African Union hotu, NKosazana Dalmini-Zuma chuan IS firfiakte chetdan chu rawng leh dawihzep thlak a tih thu a sawi a, Libya ram himna turin member 54 awmna, AU chuan theithawp a chhuah dawn a ni, a ti.

France President Fran­cois Hollande pawh­in rawng taka Ethiopia mite tihhlum an nih dan chuan a ti thinur hle tih a sawi a, Libya ramah dan leh thupek kenkawh a, boruak ralmuang a awm theihna turin hmalak chu thil pawimawh tak a nih thu a sawi bawk.

European Union leh United States pawhin IS-te chetdan rawng tak chu an dem thu an sawi a, EU thupuangtu chuan, "Hei hi khawthlang ramte leh Islam inbeihna a ni lo. Hei hi sakhaw thil hmansualna, thuneih duhna a ni," a ti.

IS firfiakte hian Iraq-a an ram lak, Mosul khuaah Kristiante thlan suasamin, an tichhe vek bawk. Kristiante thlanmual an suasam lai thla hi firfiakte hian an social media website-ah an dah lang bawk.