Thamna laa puh vangin SKorea PM-in banna thehlut
South Korea Prime Minister Lee Wan-Koo chuan President Park Geun-Hye chu thamna laa puh an nih avangin PM anihna aṭangin banna a thehlut.
President Park-i hi Latin America ramah a zin mek a, a thupuangtu chuan karleha a haw hunah PM banna thehluh hi a pawm dawn leh dawn loh a tichiang dawn tih a sawi. President hi April 27 hian an ramah a kir chauh ang.
PM-in ban a tum chungchang hi hriattir a nih hnuin, President Park-i chuan, "Hei hi pawi ka ti hle a ni. Prime Minister-in dinhmun khirh tak a hmachhawn mek pawh chu a khawngaihthlak hle a ni," a ti.
Lee hian thla hnih chauh PM dinhmun hi a la chelh a, mahse eptu party-te'n sorkar-a senior member-te'n thamna an lak chungchangah bang tura nawr an tum thu an lo sawi tawh a ni.
Tun thla tir lam khan construction company hotu hlui, Sung Wan-Jong chu a intihlum a, a lehkha hnutchhiahah mi pariat-te hming leh an sum pek zatte a ziak lang a, hetah hian PM Lee leh President chief of staff lee Byung-Kee hming pawh a ziak lang a ni. Sung hi a company hlawkna tura politician leh sorkar official-te thamna sum pe ṭhina puh a ni a, prosecutor-te'n thu zawhfiah an tum laiin a intihlum a ni. A lehkha hnutchhiahah hian PM Lee chu sumdawng pakhat hnen aṭanga thamna, won maktaduai 30 dawngah a puh.
President chuan eiruknaa inhnamhnawihte chu tu pawh ni se hremna pek ngei a tiam. PM chuan thamna laa puh a nihna chu phain, prosecutor-te'n thamna sum a la ngei tih an finfiah theih chuan a nunna ngei pawh thap a huam thu a sawi.