Israel-in Hezbollah nena inkahhai puang tura rawtna a hnawl

Israel finance minister Bezalel Smotrich chuan Israel leh a thawhpui ramten Lebanon helpawl, Hezbollah nena ni 21 inkahhai an puanna tura rawtna an siam chu an hnawl thu nimin, September 26 khan a sawi.

"Hmar lama beihpui kan thlaknaah chuan a tawpna tur pakhat chauh a awm, chu chu Hezbollah te hneh a, kan ram hmarlama chengte an tih nat theihna tih chimit vek a ni," a ti. Israel Minister hian ni 21 chhung inkahhai puan chu Hezbollah te tana intuaithar lehna siamsakna mai tur zawk a nih thu a tarlang.

Inkahhai puan rawtna an hnawl hnuah, Israel prime minister Benjamin Netanyahu chuan Israel sipaite chu Lebanon-a beihpui an thlaknaah tha tawp chhuaha bei turin a chah zui nghal. Gaza Strip-ah pawh an thil tum a hlawhtlin hma chu beihpui an thlak zel dawn tih a sawi bawk a ni. Gaza indonaah hian Palestinian mi 41,495 vel an thi tawh niin Hamas lam chuan an sawi a, a tam zawk chu civil mi an nih thu an sawi.

Lebanon health ministry chuan Thawhṭanni aṭanga Israel sipaite beihna avangin mi 550 chuang an thi tawh niin a sawi a, mi nuai 5 vel chuan an in leh lo an tlanchhiatsan tawh niin a tarlang bawk.

Israel hian Lebabon-a beihpui a thlakna hi boruak aṭang hlirin a la kalpui a, mahse khawmual lam aṭanga bei tura inbuatsaih turin Israel army chief, Lt Gen Herzi Halvei chuan sipaite a hrilh tawh. Lt Gen Halevi chuan Israel sipaite chuan Hezbollah helte chu khawi hmunah pawh an bei chhunzawm zel dawn tih a sawi.

US, European Union leh an thawhpui ram dangte chuan Israel-in Hezbollah laka beihpui a thlak hnuah Lebanon-a ni 21 chhung inkahhai puang tura ngenna hi an ti chhuak a ni.

US president Joe Biden, France president Emmanuel Macron leh hruaitu dangten thuchhuah inṭawm an siamah, Lebanon chu dinhmun ṭha lo takah a ding mek a, indona hi Lebanon leh Israel mipuite pawhin an duh lo a ni, an ti.

Hei vang hian inbiakna hmanga inremna kawng zawn a nih theihna turin, Israel leh Hezbollah te hnenah an inbeih mekna chu ni 21 chhung chawlhsan turin an ngen.

Ram hrang hrang hruaitute hi New York-a United Nations General Assembly neih kar lakah inhmuin, Israel-Hezbollah chungchanga thuchhuah inṭawm hi an siam a ni.