Egypt President hlui kum 20 táng tura hrem a ni

Egypt President aṭanga sipai chakna hmanga paihthlak tak, Mohamed Morsi chu kum 2012-a amah duh lohna lantira nawrh huaihawtte man leh nghaisaa puhna thubuaiah thiam loh chantir a ni a, kum 20 jail tang turin Egypt Court chuan an hrem.

Cairo Criminal Court chuan Morsi-a party, Muslim Brotherhood hruaitu 20 dangte pawh kum 20 tang turin a hrem bawk a, mi dang pahnih chu kum 10 tang turin a ti. Thawhlehni khan court thutlukna hi puan a ni.

Morsi hi President a nihna aṭanga paihthlak a nih hnu hian hren zui nghal a ni a, thubuai eng emaw zat siamsak a ni. A thubuai zingah hian a President laia nawrh huaihawttu, eptute man leh kutthlak tura thupea puhnate pawh a tel.

Kum 20 tang tura thiam loh chantir a nih rual hian, a thubuai dang, nawrh huaihawtte tihhlum tura thupea puhna thubuaiah chuan Morsi leh midang 14-te chu thiam chantir an ni thung. He thubuaiah hian thiam loh chantir ni se chuan thi tura hremna thleng pek theih an ni ang.

Morsi hi kum 2013 July thla khan a kaihhruai sorkar duh lohna lantira hun eng emaw chen nawrh huaihawt a nih hnuah sipai chakna hmanga paihthlak a ni a, paihthlak a nih hnu hian amah thlawptute chuan lungawi lohna lantirin security force-te nen an intibuai a, buaina chhuakah hian mi 1,000 vel zet an thih bakah mi sang tel man an ni bawk.

Sipai hotu hlui, Egypt President atana thlan zui tak Abdel Fatah al-Sisi kaihhruai sorkar chuan Muslim Brotherhood hi firfiak pawlah a puang tawh bawk. Brotherhood hotu lu, Mohamed Badie hi jail-ah a tang mek a, a thubuai eng emaw zatah tihhlum turin a chung­thu relsak a ni tawh.