Saudi-in Yemen a beihpui thlâk a titawp ta
Saudi Arabia kaihhruaia Arab ṭangrual ramte'n Yemen-a Houthi hel laka beihpui an thlak, Decisive Storm tia a vuah chu an tum a hlawhtling thawkhat tawhah ngaiin Thawhlehni aṭang khan an ti tawp.
Arab ṭangrual ramte hian thla khat dawn chu Yemen sorkar paihthlak tumtu, Houthi helpawlte lakah hian beihpui a thlak a, mahse heti chung hian helpawlte hi an dang bet hlei thei lo a ni.
Helpawl hmun pawimawh an bomb te chu titawpin, hmalakna thar Restoration Hope tih an kalpui dawn a, hemi hmang hian Yemen tualchhung buainate chinfel dan kawng an zawnpui tawh dawn a ni.
Houthi helpawl thlawpa puh, Iran chuan sipai chakna hmanga beihpui thlak tihtawp a ni ta chu lawmawm a tih thu a sawi a, hemi rual hian helpawlte a thlawp lo tih a sawi nawn leh bawk. Iran sorkar thupuangtu chuan, "Yemen buaina hi sipai hmanga chinfel theih a ni lo. Pawisawilo civil mite tihhlum an ni ṭhin hi tihtawp a ngai a, hmalakna thar kalpui a ṭul a ni," a ti.
Helpawlte'n an ram khawpui, Sanaa an lak hnuah Yemen President Abdrabbuh Mansour Hadi chu hun eng emaw chen pawn chhuak thei loin an hreng a, hemi hnu hian Hadi hi Saudi Arabia ramah a tlanchhe zui ta a ni.
US pawhin Saudi-in beihpui thlak tihtawp a tum ta chu lawmawm a tih thu a sawi a, Yemen buaina chingfel tura inbiakna neih dan kawng zawng turin a ngen.