Israel beihpui thlaknaah Hezbollah drone unit hotu a thi

Israel sipaiten Ningani, September 26, 2024-a Lebanon khawpui, Beirut chhim lam an beihnaah Hezbollah drone unit hotu, Mohammed Surur a thi. Surur thih thu hi Hezbollah leh Israel sipaiten an nemnghet ve ve a ni.

Iran thlawp Hezbollah chuan thuchhuah an siamah, Israel in a beihnaah Mohammed Surur a thi tih a sawi. Israel sipaite chuan an fighter jet hmangin Surur hi bitumin an dah bo ta tih an sawi bawk a, Surur chu Hezbollah air unit commander a nih thu an tarlang bawk.

Israel sipaite hian tun kar chhungin mipui chen bitna hmuna Hezbollah commander-te an beih ṭum lina a ni.

Lebanon health ministry chuan Ningania Israel beihpui thlaknaah hian mi pahnih an thi a, hliam 15 awm nia sawiin, hliam zinga hmeichhe pakhat chu a ngaihtuahawm hle niin a tarlang.

Mohammed Surur hi kum 1973-a piang niin, Yemen-a Huthi helte training pe tura Hezbollah in top adviser a thawn zingah pawh a lo tel tawh a ni. Israel-in a beih lai hian Surur hi Beirut-a in chhawng 10-a sangah a awm. He hmun hi Hezbollah commander-ten an thunun a ni. Israel hian missile pathumin building hi a kap nia sawi a ni.

Ram hrang hrangte inkahhai puang tura an nawr mek karah Israel leh Hezbollah te hi an la inbei chhunzawm zel. US leh a thurualpui ramten ni 21 chhung inkahhai puang tura rawtna an siam chu Israel chuan a lo hnawlsak tawh a, mahse Israel prime minister Benjamin Netanyahu chuan a team-te chuan Lebanon-a inkahhai puan a nih theih dan ngaihtuahin US chu inbiakna a neihpui zel dawn tih a sawi.