Myanmar sipai sorkarin inbiakna nei turin helpawlte a sawm

Myanmar sipai sorkar chuan sipai sorkar dodal a, ralthuam nena che ṭhin pawlte chu an ralthuamte dah a, inbiakna nei turin a sawm. Mahse helpawlte chuan he sawmna hi an hnar nghal a ni.

Sipai sorkar, State Administration Council (SAC) chuan chi bing helpawl leh People’s Defence Forces (PDF) te chu firfiak zawnga an chet ṭhinte titawpa inthlan neihna tur atana party din tura tiin, inbiakna neihpuiah a sawm tih nimin, September 27 khan sorkar enkawl, Global New Light of Myanmar chuan a ti chhuak.

Mahse sipaiten civil sorkar thuneihna an hnehchhuh hnua Parliament memberten mipui sorkar aiawh tura an din, National Unity Government (NUG) sipai sorkar rawtna hi an hnawl thu an sawi ve nghal. NUG thupuangtu, Nay Phone Ltt chuan an rawtna siam chu ngaihtuahzui tlak pawh a ni lo, tiin sipaite chuan inthlanpui buatsaih turin thuneihna an nei lo a ni, a ti.

Sipai sorkar a din hnuah helpawl din thar, Bamar People’s Liberation Army hotu Maung Saungkha pawhin sipaite rawtna siam hi an ngaihven ve lo tih a sawi bawk.

Kum 2021, February thlaa civil sorkar thuneihna hnehchhuh a, sorkarna an siam hnuah Myanmar sipaite hian NUG hi inbiakna neihpui tura a sawm ṭum khatna a ni. Heti hian sipai sorkarin inthlanpui buatsaih a tumah hian political party eng emaw zat chu chuh ve thei loin a ṭhiahsak tawh a, heng zingah hian kum 2021-a an paihthlak tak sorkarna siamtu, National League of Democracy (NLD) pawh an tel. Party tam tak inthlan chuh thei loa siam an nih avangin inthlanpui hi buatsaih pawh ni se, inthlan result hi khawthlang ramte chuan an pawmpui a rinawm lo a ni.