Japan PM thar tur Shigeru Ishiba

Japan-a rorellai party, Liberal Democratic party hruaitu thar atan defence minister hlui, Shigeru Ishiba thlan a ni a, prime minister thar a ni ang.

Japan prime minister Fumo Kishida-a'n August thlaa an party hruaitu thlanna turah chuh a tum tawh lo tih a sawi hnuah, LDP hruaitu thar thlanna hi neih niin candidate pakua an awm. LDP hi Parliament-ah majority an nih avangin an party leader hi PM a ni dawn a, hruaitu atana thlan thar Ishida hi kar leh lamah PM tur hian ruat a ni ang.

Kum 67 mi, veteran politician Ishiba hian party hruaitu thlanna hi ṭum nga a chuhna a ni a, tun bak hi chuh a tum tawh loh thu pawh a lo sawi tawh a ni. Candidate pakua aṭangin hruaitu thar tur hi thlan niin, inthlan thawh khatnaah tling tura vote hmuh ngai zat hmu pha an awm loh avangin vote hmu hnem pahnih Ishiba leh Sane Takachi, 63, te chuan inthlan thawh hnihnaah an hmachhawn leh a ni. Inthlan thawh hnihnaah hian Ishiba hian vote 215 a hmu a, Takaichi-i hian vote 194 a hmu ve bawk. Party hruaitu hi Parliament-a LDP member bakah party member thlan bikten an thlang a ni.

Ishida hi an ram lal atana hmeichhia ruat thlawptu zinga mi niin, hei hi LDP member tam tak leh sorkar hmasa te pawhin an duh loh a ni. PM Kishida pawh langsar taka sawisel mai hreh lo niin, Japan politics-ah hian mahni party mi leh sa sawisel hi thil thleng tam lo tak a ni. Thu sawi thiam tak a ni a, party politics leh security policy siamna kawngah mi pawimawh tak a ni bawk. An ram economy siamṭhatna tura a hma lak tumna a sawi zingah thil man sang zel avanga hlawh tihsan a tum thu pawh a tel. Ni khatah lehkhabu pathum a chhiar ṭhin tih sawiin, party mi leh sate nena inchimbuai reng ai chuan lehkhabu chhiar a thlang zawk tih a sawi.

LDP hruaitu tur thlan a nih tak avangin karleh Thawhlehni, October 1 hian PM Fumio Kishida leh a cabinet minister-te chu an bang tawh dawn a ni. Hemi hnu hian Ishiba chu Parliament-ah PM thar atan hian thlan leh niin, a cabinet minister turte a ruat fel ang.