Israel beihpui thlaknaah Hezbollah hotu lu ber a thi

Israel sipaite chuan Zirtawpni liam taa Lebanon khawpui, Beirut chhim lama beihpui an thlaknaah Hezbollah helpawl hotu lu ber, Hassan Nasrallah a thi tih Inrinni, September 29 khan a sawi.

Hezbollah pawhin an hotupa thah anih thu hi an puang zui ve bawk a, 'Hezbollah secretary general Sayyed Hassan Nasrallah chuan kum 30 a lo kaihhruai tawh pawl tana martar te chu a zawm ve ta," tiin tarlang.

Israel Defence Force (IDF) chuan Hezbollah hotu thih thu hi an ram huna Inrinni chawhma dar 11 khan X ah a post a, 'Khawvel ti ralṭi turin Hassan Nasrallah chu a awm tawh lo' tiin an tarlang.

Nasrallah hi kum 1960-a piang niin, kum 30 chuang Hezbollah hi a lo kaihruai tawh a, mahse vantlang hmuhah erawh a inlan tam lo hle thung. Hezbollah pawlin Israel ram leh Juda mite an beihna tam takah mawhphurtu bera puh a ni. Kum 1975-ah Amal movement a zawm a, 1982-ah he pawl aṭang hian chhuakin Islamic Amal tih a din a, a hnuah Hezbollah tiin an siamthar leh a, Iran Revolution Guard-te an thlawp ṭha hle a ni. Kum 1992-a Israel sipaiten an pawl hotu, Abbas al-Musawi an thah avangin kum 32 mi lek niin Hezbollah hotu lu ber dinhmun hi a luah a, he dinhmun a luah hnua a tih hmasa ber chu al-Musawi thihna vanga phuba lakna atana Israel hmar lam bei tura thupek a tih chhuah a ni. Hezbollah hotu dinhmun a luah hnu hian Israel kuta a thih hlauh vangin vantlang hmuhah a inlan khat hle nia sawi a ni.

Israel prime minister Benjamin Netanyahu chuan Nasrallah thih thu puan a nih hnua thu a sawiah, Nasralalah thah chu Israel in an thil tuma hlawhtlinna an neihna tur atana thil ṭul leh pawimawh a ni tiin, Nasrallah chu firfiak satliah a ni lo a ni, a ti. Israel chuan Hezbollah lakah nasa zawka beihpui thlak chhunzawm zel a tum a ni.

Hezbollah hotu lu ber an thah hnuah, Inrinni khan Israel sipaite chaun Hezbollah central council member, Nail Qaouk an thah thu an sawi leh bawk. Inrinnia beihpui an thlaknaah Hezbollah hmun pawimawh tak tam tak an kah chhiat thu an tarlang. Lebanon media lam pawhin Israel beihpui thlaknaah hian mi 15 an thi niin an sawi ve bawk.

Kar liam ta Thawhṭanni aṭang khan Israel hian Lebanon-a Hezbollah ho hmunte chu ngawrh takin a bei chho a, Israel sipaite beihna avanga thi hi mi 720 an tling tawh nia sawi a ni.

Tunge Nasrallah thlak dawn ?

Hezbollah hotu lu ber, Hassan Nasrallah thah a nih tak avangin a thlaktu tur hi ruat thuai a ngai dawn a, a thlaktu atan hian Hashem Safieddine leh Naim Qassem te chu sawi rik an ni.

Kum 1964-a piang, Hashem Safieddine hi Hezbollah executive council hotu a ni a, Nasrallah laina hnai a ni bawk. Hezbollah hnuaia Shura Council leh Jihadi Council-a member pawimawh tak a ni. US leh Saudi Arabia chuan firfiakah puang tawhin, an rama an thil neihte pawh khawih chet theih lohin an lo hreksak tawh a ni. Naim Qassem hi kum 71 mi a ni tawh a, Hezbollah deputy secretary-general ni lai a ni. Beirut-ah hian an sakhaw inzirtirna kawngah hun rei tak zirtir hna a lo thawk tawh a, a pawl religious scholar zinga mi a ni.

Iran hotuin phuba lak a tiam

Israel sipaiten Iran thlawp, Hezbollah helpawl hotu lu, Hassan Nasrallah an thah avangin Iran supreme leader, Ayatollah Ali Khamenei chuan phuba lak a ni dawn tih a sawi zui ve nghal.

Khameini chuan Zirtawpni zan khan Supreme National Council emergency meeting a ko nghal a, Nasrallah chu ni nga chhung sunna hun hman a ni dawn tih a sawi bawk. Iran first vice president Mohammad Reza Aref pawhin Nasrallah thihna chuan Israel tan chhiatna nasa tak a thleng dawn a ni tiin, Iran foreign ministry chuan Nasrallah hnathawhte chu an chhunzawm zel tur thu an tarlang a ni.

Gaza Strip-a Israel nena indo mek, Palestinian firfiak pawl Hamas pawhin Nasrallah thihna chu pawi an thih thu sawiin, he thihna avang hian Lebanon leh Palestine aṭangin beihna a nasa dawn a ni tiin, Israel an vau zui.

Iran Spy-in Hezbollah hotu awmna hrilh

France chanchinbu, Le Parisien chuan Israel sipaiten Beirut an beihnaah Hezbollah hotu, Nasrallah an thah hma lawk hian Iran spy chuan a awmna hmun hi Israel thuneitute a hrilh niin a sawi.

Spy hian Israel hnenah Nasrallah hi Beirut chhim lam khawdaia underground headquarters ah a awma, an pawl member pawimawh dangte nen meeting an nei tia a hrilh thu chanchinbu hian a tarlang a ni.